ವಿಶ್ವದೆಲ್ಲೆಡೆ ಜೂನ್ 21 ನ್ನು ಅಂತರಾಷ್ಟ್ರೀಯ ಯೋಗ ದಿನವನ್ನಾಗಿ ಆಚರಿಸಲಾಗುತ್ತದೆ. ಪರಿಪೂರ್ಣ ಆರೋಗ್ಯಕ್ಕೆ ಪರಿಣಾಮಕಾರಿ ಯೋಗವನ್ನು ಜಗತ್ತಿಗೆ ಸಾರಿದ ಅಂತರಾಷ್ಟ್ರೀಯ ಯೋಗ ದಿನವನ್ನು ಭಾರತೀಯ ಅಂಚೆ ಇಲಾಖೆಯೂ ವಿಶಿಷ್ಟ ರೀತಿಯಲ್ಲಿ ಆಚರಿಸಿಕೊಂಡು ಬಂದಿದೆ.
2015 ರ ಜೂನ್ 21 ರಂದು ಅಂತರಾಷ್ಟ್ರೀಯ ಯೋಗದಿನವನ್ನು ಘೋಷಿಸಿದ್ದು ಆ ದಿನ ಭಾರತೀಯ ಅಂಚೆ ಇಲಾಖೆ ಯೋಗದಿನವನ್ನು ಪ್ರತಿನಿಧಿಸುವ ಎರಡು ಅಂಚೆ ಚೀಟಿಗಳನ್ನು ಮತ್ತು ಅಂಚೆ ಚಿಕಣಿಹಾಳೆಗಳನ್ನು ಬಿಡುಗಡೆಗೊಳಿಸಿತ್ತು. 2016 ರಲ್ಲಿ ಸೂರ್ಯ ನಮಸ್ಕಾರದ ವಿವಿಧ ಭಂಗಿಗಳುಳ್ಳ ಅಂಚೆ ಚೀಟಿಗಳನ್ನು, ಅಂಚೆ ಚಿಕಣಿ ಹಾಳೆಗಳನ್ನು ಭಾರತೀಯ ಅಂಚೆ ಇಲಾಖೆ ಬಿಡುಗಡೆಗೊಳಿಸಿತ್ತು.
ಈ ವರುಷ ಕೋವಿಡ್ 19ನ ಸಂದಿಗ್ಧ ಸಮಯದಲ್ಲಿ ಅಂತರಾಷ್ಟ್ರೀಯ ಯೋಗದಿನವನ್ನು ವಿಶಿಷ್ಠವಾಗಿ ಆಚರಿಸುವ ಇರಾದೆಯೊಂದಿಗೆ ಭಾರತೀಯ ಅಂಚೆ ಇಲಾಖೆ ವಿಶೇಷ ರೀತಿಯ ಕ್ಯಾನ್ಸಲೇಷನ್ ಸ್ಟಾಂಪ್ ( special Cancellation Stamp) (ಅಂಚೆ ಚೀಟಿ ರದ್ದತಿ ಮೊಹರು) ನ್ನು ಹೊರ ತರುತ್ತಿದೆ.
ನಮ್ಮ ದೇಶದ ಸುಮಾರು 810 ಪ್ರಧಾನ ಅಂಚೆ ಕಚೇರಿಗಳಲ್ಲಿ ಈ ಸೇವೆ ಅಂತರಾಷ್ಟ್ರೀಯ ಯೋಗ ದಿನವಾದ ಜೂನ್ 21 ರಂದು ಲಭ್ಯವಿದೆ. ಉಡುಪಿ ಅಂಚೆ ವಿಭಾಗದ ಉಡುಪಿ ಪ್ರಧಾನ ಅಂಚೆ ಕಚೇರಿ,ಮಣಿಪಾಲ ಪ್ರಧಾನ ಅಂಚೆ ಕಚೇರಿ, ಕುಂದಾಪುರ ಪ್ರಧಾನ ಅಂಚೆ ಕಚೇರಿಯಲ್ಲಿ ಈ ಸ್ಪೆಷಲ್ ಸ್ಟಾಂಪ್ ಕ್ಯಾನ್ಸಲೇಷನ್ ಲಭ್ಯವಿದ್ದು ಈ ಸೇವೆಗೆ ಯಾವುದೇ ಹೆಚ್ಚುವರಿ ಶುಲ್ಕ ಇರುವುದಿಲ್ಲ.
ಗ್ರಾಹಕರು ಇಲ್ಲವೇ ಅಂಚೆ ಚೀಟಿ ಸಂಗ್ರಹಕಾರರು ತರುವ ಕವರ್, ಕಾರ್ಡ್ ಮೇಲೆ ಅಂತರಾಷ್ಟ್ರೀಯ ಯೋಗ ದಿನದ ಚಿತ್ರ ವಿನ್ಯಾಸಗಳುಳ್ಳ ಸ್ಪೆಷಲ್ ಸ್ಟಾಂಪ್ ಕ್ಯಾನ್ಸಲೇಷನ್ ನ್ನು ಮುದ್ರಿಸಿ ಕೊಡಲಾಗುವುದು.
ಆಸಕ್ತರು ಅಂಚೆ ಚೀಟಿ ಸಂಗ್ರಹಕಾರರಾಗಲು ವಿಪುಲ ಅವಕಾಶಗಳಿದ್ದುಕೇವಲ 400 ರೂಗಳನ್ನು ಪಾವತಿಸಿದಾಗ ಅದರಲ್ಲಿ ರೂ 200/- ನ್ನು ಠೇವಣಿಯಾಗಿರಿಸಿಕೊಂಡು ಮತ್ತುಳಿದ ಹಣಕ್ಕೆ ಹೊಸ ಹೊಸ ಅಂಚೆ ಚೀಟಿಗಳು ಯಾವುದೇ ಶುಲ್ಕವಿಲ್ಲದೆ ಮನೆ ಬಾಗಿಲಿಗೆ ಬರುವಂತಹ ಫಿಲಾಟಲಿ ಡೆಪಾಸಿಟ್ ಖಾತೆ ಯೋಜನೆಯೂ ಅಂಚೆ ಕಚೇರಿಯಲ್ಲಿದೆ.
ಈ ವರುಷ “ಮನೆಯಲ್ಲಿರಿ… ಯೋಗದೊಂದಿಗೆ ಇರಿ” ಎಂಬ ಘೋಷಣಾವಾಕ್ಯದೊಂದಿಗೆ ಅಂತರಾಷ್ಟ್ರೀಯ ಯೋಗದಿನವು ಆಚರಿಸಲ್ಪಡುತ್ತಿದೆ.
ಆಸಕ್ತರು ಯೋಗ ದಿನವಾದ 21.06 .2021ರಂದು ಉಡುಪಿ, ಮಣಿಪಾಲ, ಕುಂದಾಪುರ ಪ್ರಧಾನ ಅಂಚೆ ಕಚೇರಿಗಳಲ್ಲಿ ಅಂತರಾಷ್ಟ್ರೀಯ ಯೋಗ ದಿನದ ಸ್ಪೆಷಲ್ ಅಂಚೆ ಚೀಟಿ ಕ್ಯಾನ್ಸಲೇಷನ್ ( special stamp cancellation) , ವಿಶೇಷ ಅಂಚೆ ಚೀಟಿ ರದ್ದತಿಯನ್ನು ಪಡೆದುಕೊಳ್ಳಬಹುದೆಂದು ಉಡುಪಿ ಅಂಚೆ ವಿಭಾಗದ ಅಂಚೆ ಅಧೀಕ್ಷಕರಾದ ನವೀನ್ ಚಂದರ್ ರವರು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.