ಬಾರಕೂರಿನ ಚೌಳಿಕೇರಿಯ ಶ್ರೀ ಮಹಾಗಣಪತಿ ದೇವಾಲಯದಲ್ಲಿನ ಶ್ರೀ ಮಹಾಲಿಂಗೇಶ್ವರ ಗುಡಿಯ ಗರ್ಭಗೃಹದ ಎಡ ಬದಿಯ ದ್ವಾರಪಾಲಕ {ಜಯ-ವಿಜಯ} ಇರುವ ಪೀಠದಲ್ಲಿ ಒಂದು ಸಾಲಿನ ಚಿಕಣಿ ಶಾಸನವನ್ನು ಇತಿಹಾಸ ಮತ್ತು ಪುರಾತತ್ವ ಸಂಶೋಧನಾರ್ಥಿ ಶ್ರುತೇಶ್ ಆಚಾರ್ಯ ಮೂಡುಬೆಳ್ಳೆ ಅವರು ಪತ್ತೆ ಮಾಡಿರುತ್ತಾರೆ. ಶಾಸನವು 15ನೇ ಶತಮಾನದ ಕನ್ನಡ ಲಿಪಿ ಮತ್ತು ಭಾಷೆಯ ‘ಶ್ರೀ ಪ್ರಮದೂತ ಸಂವತ್ಸರದ ಜೆಷ್ಟ ಶು 5 ಲೂ ಶ್ರೀ ಮಹಾಚೌಳಿ’ ಎಂಬ ಉಲ್ಲೇಖವನ್ನು ಹೊಂದಿದೆ.
ಶಾಸನ ಉಲ್ಲೇಖಿತ ಸಂವತ್ಸರದಲ್ಲಿ ಈ ದ್ವಾರಪಾಲಕನ ವಿಗ್ರಹವನ್ನು ಪುನರ್ ಪ್ರತಿಷ್ಠಾಪಿಸಿರಬಹುದೆಂದು ಸಂಶೋಧನಾರ್ಥಿಯು ಅಭಿಪ್ರಾಯ ಪಟ್ಟಿರುತ್ತಾರೆ. ಏಕೆಂದರೆ ಸಾಮಾನ್ಯವಾಗಿ ದೇವಾಲಯಗಳಲ್ಲಿರುವ ಜಯ-ವಿಜಯರ ಶಿಲ್ಪಗಳು ಏಕರೂಪವಾಗಿರುತ್ತದೆ. ಆದರೆ ಈ ದೇವಾಲಯದಲ್ಲಿನ ಜಯ-ವಿಜಯರ ವಿಗ್ರಹಗಳು ಗಾತ್ರ ಮತ್ತು ಭಂಗಿಯಲ್ಲಿ ಒಂದನ್ನೊಂದು ಹೋಲುವುದಿಲ್ಲ. ಇದರಿಂದ ನಂತರದ ಕಾಲದಲ್ಲಿ ಈ ಒಂದು ಮೂರ್ತಿಯನ್ನು ಪ್ರತಿಷ್ಠಾಪಿಸಿ ಶಾಸನವನ್ನು ಹಾಕಿಸಿರಬಹುದು.
ಕ್ಷೇತ್ರಕಾರ್ಯ ಶೋಧನೆಯ ಸಂದರ್ಭದಲ್ಲಿ ದೇವಾಲಯದ ಅರ್ಚಕರಾದ ವೆಂಕಟೇಶ ಭಟ್, ಎಮ್.ಎಸ್. ವಿಶ್ವವಿದ್ಯಾನಿಲಯ ಬರೋಡ ಇಲ್ಲಿನ ವಿದ್ಯಾರ್ಥಿ ಗೌರೀಶ್ ಪ್ರಭು ಮತ್ತು ನಿಟ್ಟೆ ಮೆಕಾನಿಕಲ್ ಇಂಜಿನಿಯರ್ ವಿದ್ಯಾರ್ಥಿ ಅಭಿಷೇಕ್ ಶೆಣೈ ಅವರು ಸಹಕಾರ ನೀಡಿದ್ದಾರೆ.
By 
ForthFocus™