ನೀಲಾವರ ಸುರೇಂದ್ರ ಅಡಿಗರ ತೆಕ್ಕೆಗೆ ಮಲಬಾರ್ ವಿಶ್ವ ಸಾಹಿತ್ಯ ಪುರಸ್ಕಾರ- 2023

ಪುರಸ್ಕೃತರು : ನೀಲಾವರ ಸುರೇಂದ್ರ ಅಡಿಗ
( ಸಮಗ್ರ  ಸಾಹಿತ್ಯ)

ಶ್ರೀಯುತ ನೀಲಾವರ ಸುರೇಂದ್ರ ಅಡಿಗ: ಉಡುಪಿ ತಾಲೂಕಿನ ನೀಲಾವರದಲ್ಲಿ ಎನ್ ಅನಂತ ಅಡಿಗ ಹಾಗು ಯಶೋದಮ್ಮ ದಂಪತಿಗಳ ಸುಪುತ್ರನಾಗಿ ಜನಿಸಿ ಎಂ ಎ ( ಕನ್ನಡ) ,ಕನ್ನಡ ರತ್ನ, ಕನ್ನಡ ಹಾಗು ಆಂಗ್ಲ ಭಾಷೆ ಟೈಪಿಂಗ್, ಗಮಕ‌ ಜೂನಿಯರ್ ಗ್ರೇಡ್ ಪದವಿ, ಪಡೆದಿರುವ ಶ್ರೀಯುತ ನೀಲಾವರ ಸುರೇಂದ್ರ ಅಡಿಗರು ಕನ್ನಡ ಸಾರಸ್ವತ ಲೋಕದಲ್ಲಿ ಚಿರಪರಿಚಿತರು. ಕನ್ನಡವನ್ನು ಎದೆಗಪ್ಪಿಕೊಂಡು, ಕನ್ನಡವನ್ನೇ ಉಸಿರಾಗಿಸಿಕೊಂಡು,ಕನ್ನಡವನ್ನೇ ಬಾಳ ದೀಕ್ಷೆಯಾಗಿಸಿಕೊಂಡವರು ಇವರು.

ಉಡುಪಿ ಜಿಲ್ಲೆ ಕುಂದಾಪುರ ವಲಯದ ತೆಕ್ಕಟ್ಟೆ ಕುವೆಂಪು ಶತಮಾನೋತ್ಸವ ಮಾದರಿ ಶಾಲೆಯಲ್ಲಿ ಅಧ್ಯಾಪಕನಾಗಿ ಸೇವೆ ಸಲ್ಲಿಸಿ ಇದೀಗ ಮನಮೆಚ್ಚಿದ ಮಡದಿ ಶ್ರೀಮತಿ ಸುನಂದ ಹಾಗು ಅಕ್ಕರೆಯ ಮಕ್ಕಳಾದ ಸೃಜನಾ ಮತ್ತು ಸುವೃತಾ ರೊಂದಿಗೆ ನಿವೃತ್ತ ಜೀವನದುದ್ದಕ್ಕೂ ಸಾಹಿತ್ಯ ಸೇವೆಯಲ್ಲಿ ತೊಡಗಿಸಿ ಕೊಂಡವರು.

ಪಠ್ಯ ಪುಸ್ತಕ ಹಾಗು ಕೈಪಿಡಿಗಳ ರಚನಾ ಸಮಿತಿ ಸದಸ್ಯನಾಗಿ ಮಕ್ಕಳ ಸಾಹಿತ್ಯಾಸಕ್ತಿಯನ್ನು ಗುರುತಿಸಿ ನೀರೆರೆದು‌ ಪೋಷಿಸಿದವರು. ಉತ್ತಮ ಶಿಕ್ಷಕ ಪ್ರಶಸ್ತಿ, ,ಜನಮೆಚ್ಚಿದ ಶಿಕ್ಷಕ ಪ್ರಶಸ್ತಿ, ಜಿ.ಪಿ. ರಾಜರತ್ನಂ ದತ್ತಿ ಪ್ರಶಸ್ತಿ, ಗುರು ಭೂಷಣ ಪ್ರಶಸ್ತಿ, ಶ್ರೇಷ್ಠ ಅಧ್ಯಾಪಕ ಪ್ರಶಸ್ತಿ, ಡಾ.ರಾಧಾಕೃಷ್ಣನ್ ಪ್ರಶಸ್ತಿ,2007 ರ ಅತ್ಯುತ್ತಮ ಲೇಖಕ ಪ್ರಶಸ್ತಿ, ಅತ್ಯುತ್ತಮ ಕ್ಷೇತ್ರ ಸಂಪನ್ಮೂಲ ವ್ಯಕ್ತಿ,ಉಪಾಧ್ಯಾಯ ಸನ್ಮಾನ್, ಕನ್ನಡದ ಕಟ್ಟಾಳು, ಕರ್ನಾಟಕ ಸಂಘಟನಾ ರತ್ನ ಪ್ರಶಸ್ತಿ, ವಿಪ್ರ ಸಾಧಕ ಶ್ರೀ ಹೀಗೆ ಹತ್ತು ಹಲವು ಪ್ರಶಸ್ತಿ ಪುರಸ್ಕಾರ ಗಳ ಸರದಾರ ಇವರು.

ವಿವಿಧ‌ ಪ್ರತಿಷ್ಟಿತ ಸಂಘ ಸಂಸ್ಥೆಗಳಲ್ಲಿ ಸಕ್ರಿಯವಾಗಿ ಕಾರ್ಯ ನಿರ್ವಹಿಸಿದ್ದೇ ಅಲ್ಲದೆ ಕನ್ನಡ ಸಾಹಿತ್ಯ ಸಮ್ಮೇಳನಗಳಲ್ಲಿ ಮಕ್ಕಳ ಸಾಹಿತ್ಯ ಸಮ್ಮೇಳನಗಳಲ್ಲಿ ಗುರುತರ ಜವಾಬ್ದಾರಿ ಹೊತ್ತು ಸಮ್ಮೇಳನಗಳ ಯಶಸ್ಸಿಗೆ ಕಾರಣರಾಗಿ  ಧನ್ಯತೆಯ ಭಾವ ಹೊಂದಿದವರು.

ಎದೆಯ ಬಗೆದರೂ ಇರಲಿ‌ ಕನ್ನಡ .. ಹೃದಯ ಬಡಿದರೂ ಬರಲಿ ಕನ್ನಡ, ಗರ್ವದಿಂದ ಹೇಳು‌ ನನ್ನ ಭಾಷೆ ಕನ್ನಡ.. ಹೆಮ್ಮೆಯಿಂದ ಹೇಳು ನಾನು ಕನ್ನಡಿಗ ಎಂದೆನ್ನುತ್ತಾ  ಕನ್ನಡ ಭಾಷೆಯನ್ನು ತನ್ನ ತೆಕ್ಕೆಯಲ್ಲಿ ಅಪ್ಪಿಕೊಂಡು ಕನ್ನಡ ಪುಸ್ತಕಗಳನ್ನು ತನ್ನ ಜೋಳಿಗೆಯಲ್ಲಿ ತುಂಬಿಸಿಕೊಂಡು ಕನ್ನಡಿಗರನ್ನು ಕಾಯಾ ವಾಚಾ ಮನಸಾ ಒಪ್ಪಿಕೊಂಡು ಕನ್ನಡ ಸಂತನಾಗಿ  ಸಾಹಿತ್ಯಾರಾಧಕನಾಗಿ ಸತತ ಮೂರು ಬಾರಿ  ಕನ್ನಡ ಸಾಹಿತ್ಯ ಪರಿಷತ್ತು ಉಡುಪಿ ಜಿಲ್ಲಾಧ್ಯಕ್ಷರಾಗಿ ಜನಮನ‌ ಗೆದ್ದ  ಶ್ರೀಯುತ ನೀಲಾವರ ಸುರೇಂದ್ರ ಅಡಿಗರಿಗೆ ನವೆಂಬರ್ ಒಂದರಂದು ಮಲಬಾರ್  ವಿಶ್ವ ಸಾಹಿತ್ಯ ಪುರಸ್ಕಾರ -2023 ನೀಡಿ ಅಭಿನಂದಿಸಲಿದ್ದಾರೆ.